الصمت موت
يا شعب مغصوب ع السكوت
الصمت موت
اتكلمو ا
نفسي ف يوم تتعلموا
إن السكوت ملوش تمن
وإن اللي ساكت ع الزمن
أكرمله يجري يندفن
مالهوش سكن بين البيوت
يا شعب والكرباج على ضهره
ولا قال آه
يا شعب عاش يشرب مرار قهره
ويستحلاه
يا شعب مسلوب الامل
داهسه العَجَل
يحلم على سريره
وقبل ما يصحى
حلمه يموووت
والصمت موت
يا شعب وسنينك عِجاف
أصل المطر مش مَيّه
يمنعها الجفاف
لكنه خير يطعم أجير
ان كان جعان
يغزل خيطان
يفرد على العريان لحاف
وأنا ليه أخاف؟
دا نا كل حيلتي
من كنوز هذا البلد
كلمه على سن القلم
اللي اتبرى ف حب الوطن
غنيت بحبك يا وطن
وبأعلى صوت
د الصمت موت
وانا اللي بايع عمري
ماطلبتش تمن
حب ف وطن بيحبني
لو يوم بعدت
يشدني
ولو انكسرت
يلمني
وبيقرا فاتحه عليه
لما قبري يضمني
ساعة ما اموت
والصمت موت
عادل أبو زيد
ليست هناك تعليقات:
إرسال تعليق