في ذكرى شهداء مذبحة بورسعيد
وكمان سنه فاتت عليك
واحشانا ضحكة نور عنيك
واحشانا موت
نايم في احضان السكوت
من بعدك الايام
يادوب بنقول تفوت
لولا الحرام
كنا نقول بعدك نموت
يا احلى صورة
وأحلى صوت
ليه الرحيل؟
ليه الخفوت؟
ياللي السنين المُرّه
بنحلّيها بيك
- وكمان سنه فاتت عليك
واحشانا ضحكة نور عنيك
طول عمرنا ماشيين
ف نفس الاتجاه
ولا حد حوّد منّنا
ولا حد تاه
ان احنا واحد في الحياة
ولا كان بيشغلنا الرحيل
ولا كنا خايفين م الزمان
الجاحد القاسي البخيل
اللي خلاص عودنا
ان الفرح اكبر مستحيل
يا طمي نيل
فضلك علينا كلنا
الدمع ده مش دمعنا
الدمع ع الراحلين
وانت ف وسطنا
سايب اطار الصورة
ساكن قلبنا
بس العيون مشتاقة ليك
وكمان سنه فاتت عليك
عادل أبو زيد
ليست هناك تعليقات:
إرسال تعليق