بيبقولوا فى الامثال ///مرقص اقلاديوس

بيبقولوا فى الامثال
اللى يرضا ربنا بيراضيه
و اللى يتمنى الشر لغيره
الشر يرجع عليه
اصل كل الحكما قالوا
ان الخير مردوده فيه
و الشر مردوده عليه

تصدق اللى بيشرب سم و يموت
ما بيصلوش عليه
أممال الناس ليه
بتدخل فى عقولها كراهية
و الكراهية سم للعقول
و بتدخل فى قلوبها غل
و الغل سم للقلوب
و ازاى واحد يقول
باحب ربنا
حب مش معقول
و هوا معترض على عطاياه للخلق
و يمر اليوم ورا اليوم
و هوا عن خطاياه ما يتوب
و ازاى للناس معتبرة نفسها مفتحة
و بترثى يا عينى للعميان
و هما مش واخدين بالهم
من كل الجمال اللى حواليهم
لا دلوقتى و لا زمان
اللى عينيه ما بتشوفش الجمال
ازاى يحب ربنا اللى بدع الجمال
و اللى بيكره الناس اللى حواليه
ازاى بيحب ربنا
و الحب نفسه بعيد عليه
و اللى بيحسد و يحقد
ازاى مصدق
ان ربنا لكل الأمور محدد
و اللى لأقرب اللى ليه بيخون
ازاى معتبر
ان ربنا
هوا اللى بدع اللى كان
ولسه النهاردة بيبدع
و بكرا هيبدع اللى هيكون
و اللى للى حبوه بيغدر
معقول حاطط فى دماغه
ان ربنا على كل شئ يقدر
و لكل شئ مقدر
أنا نفسى
كل واحد
يقعد مع نفسه
و يعيد التفكير فى القصة كلها
و الأمور بسيطة
اولها زى ااخرها زى و سطها
املا عقلك ايمان
و املا قلبك حنان
و اتمنى من كل قلبك و عقلك
الخير للقريب و البعيد و الجيران
هتلاقى الخير يعود
على اللى اتمنيتله الخير
و يعود عليك انت كمان
الشاعر العجوز
مرقص اقلاديوس