طب أعمل ايه ياخالتي/ بقلم /وفاء عبد العزيز الزيات

♡♡♡ طب أعمل ايه ياخالتي ♡♡♡

أبويا قالي الكلام الزين يحبب فيكي خلقه
رحت أنا بعبطي إتكلمت زين ولقيت الناس لسانها طوله مترين
{{{ طب أعمل أيه ياخالتي }}}
أبويا قالي أتكلمي زين ومعلمنيش إزاي اخد حقي
ابويا قالي لو حد داس عليكي إتكلي على ربي
رحت أنا بهبلي سبت الحبل على الغارب
لما الحبل شنقني
{{{ طب أعمل ايه ياخالتي }}}
أبويا قالي أسكت ومتكلمشي
أبويا قالي يابنتي اخد الحق شطارة
لكن ماقلش اخد الحق حرقة دم بمهارة
{{{ طب أعمل أيه ياخالتي }}}
تهت ويا الناس لحد ما جبت أخري
أبويا قالي عاوزة تسلمي إمشي جنب الحيط
سبني ومعلمنيش إزاي أنزل تحت الرصيف
{{{ طب أعمل أيه ياخالتي }}}
أبويا قالي القلب الأبيض ينفع فى اليوم الأسود
ومقليش إن القلب الأبيض هيجي عليه يوم
من القسوة هيقسي
{{{{ طب اعمل ايه ياخالتي }}}
ليه كدة يابويا
طب كنت قولي
إن الناس هيجي عليها يوم ومتسألش
قلبهم عليا هيقسي
بقوا زى الحجر الصوان ميلنش
بكرة أقابلك وأحكيلك ومن الزمان أشكيلك
وهلوم عليك ومخفش
بس ساعتها لو شفتك هنسى الدنيا
حتى القسوة اللي فيها
وهقولك إنسى الزمان واللي كان واللي جرى لينا
شفتي ياخالتي

لا تؤاخذوني فى هذيان قلمي
بقلمي /وفاء عبد العزيز الزيات