(((( عــبــتــواب فى الجيــش ))))
آه
وفاضلك شهر يا عبتواب وتروح الجيش
وهتنسى المنصوره وشوارعها
وهتنسى دروبها وأريافها
وهتنسى البت اللى كتبتلها الأشعار
خِلِصِت أيام الجنه
خِلِصِت أمتع أيام العمر
وهتبدأ أيام النار
كان حبلك على ضهرك ياد
تاكل على كيفك
تلبس على كيفك
تسهر وتنام بمزاجك
فى الليل
بتمثل ويا الشبان
والعصر بتكتُب أشعار
والقلب يا عبتواب
من غير باب
قلبك مفتوح للكل
اللى بيدخل معدوم الأهل
بيلاقى فى عبتواب
أهل وأصحاب
واللى بيدخل كارِه ناسه
بيلاقى فى قلبك أحباب
حتى اللى يعادى .. واللى يقاسى
واللى يجيب سيرتك بالخير
أو بالشر
داخل على قلب مالوش باب
من غير صاحب
زى أما يكون جامع
مفتوح ليل ونهار
ممكن يدخل واحد مُـلحد
ممكن يدخل واحد
مش راغب طاعه
داخل يقضيها هِزار فى هِزار
عارف كل دا ليه بس يا عبتواب
علشانك متربى فى بيت
من غير باب
يدخله أيها جار
أيها سائل
أيها واحد
حتى ان كان غير الأصحاب
جايز دا غباء
ولا يكونش عشان جدك
كان مِطْياب
كُلها أيام تتعد على صوابع ايدك
وتروح الجيش
اعملى يا أمه كِماج
علشان لو واحد صاحبى يكون محتاج
أعْطِيه
جايز امه تكون ماتت
أو جايز ما بتعرفش عمايل الأرياف
اعملى فرخه بتقليه
واعملى طبخة قراميط فى صنيه
واعملى ماكرونه بالبشاميل
عبتواب 00000 مالك
النبى طلباتك هتخلى الواحده تِمِل
اوعاك تفتكر انك أول واحد هيروح الجيش
ولا انته يا عبتواب
ناوى تروح ماتجيش
اوعاك
انا هستناك
انت اللى مخلينى اتشعبط فى الدنيا
لَوْلاك
كنت هَسَلِّم نفسى لبهدلة الأيام
ألف سلامه عليك يا امه
دا انتى اللى مخليانى اتبغدد ع الرب
من بعدك يا امه الفرح ما هيزور القلب
بصراحه ياامه انا خايف م الجيش
ليه بس يا ولدى
هو الجيش بيعض
هو الجيش بيزعل حد
دا بقولوا يا عبتواب
اللى يحب الجيش
الجيش بيسهل أيامه
واللى بيكره أيام الجيش
الجيش مبيستغناش عنه
يرميه أيام فى السجن
أيام طلبة مطبخ ونضافه
حبسة حريه
يرميه أيام فى الخدمه عشان يتعلم
ماهو أصل الجيش
بيقولوا عليه مصنع رجاله
طب لما انته وغيرك هتخافوا
مين اللى هيحمينا من الأعداء
أبْعَتْ جوزى ابو سبعين سنه يتطوع
النبى لو راح آخر الشارع بيتوه
قوم بس اتوضا وصلى
وارمى همومك ع المولى
واللى تخاف منه يا ولدى
مفيش احسن منه يا عبتواب
فى طريقك للجامع
فوت ع الحاجه بهيجه
قولها روحى لامى ضرورى
وان كان اخوك صابر فى الشارع
ابعتلى معاه كيس اريال وصابونه
روح يا ابنى
ربنا يحميك انت ورفقاتك فى الجيش
سلامات يا نعيمه
الله يِسَلِّم عُـمرك يا ام الغاليين
عبتواب رايح بكره الجيش
قُلت اندهلك تعملى ويايا كماج
وكمان خايفه لا اكون ظالمه الواد عبتواب
هو انتى فى ايدك حاجه وحوشتيها عن عبتواب
دا انتى كمان يوم ما اتجوزتى
كان شرطك يفضل وياك
صعبان على روحى يا خالتى
يسيبنى وروح الجيش
ياحبيبتى ما يصعبش عليك غالى
الجيش يا نعيمه دا فرض
وضريبه على الشُبَّان
دا الجيش بيعلم أيها واحد
ازاى يخدم نفسه بنفسه
يغسل هدمته لما تكون محتاجه غسيل
يعمل لقمته لما يجوع
وينضف فرشته ويرتبها يوماتى
الجيش دا نشاط
حيويه
وعزيمه وقوه
انما برضو يا خاله
حبسة حريه
وأوامر
فى الوقت اللى الجسم يكون محتاج الراحه
يا عبيطه
الراحه للعواجيز
للستات
للأطفال 000 لبنات
لكبار السن
واصحاب العاهات
امال مين يحمى حدودنا
ويحافظ على أمن بلدنا
مش برضو اولادنا
ولا نأجر ناس من بره
واللى هيجى من بره هيحمينا
كانوا خلو الديب
يمشى ورا الغَـنَّـام
ويعدى اليوم
عبتواب فى طريقه لمنطقة التجنيد
أول مره يا عبتواب تركب قطر
والله وعشت اما ركبت القطر يا عبتواب
كان فى دماغى انه مكان له حُرْمه
زى البيت
انما فيه المسخره بالكوم
شو الواطى ابن الكلب
لازق ورا ضهر البت
زى اما يكون القطر معدى مِطبات
ودا مين
والله ينفع يكتب أشعار
ساقعه يا بيبسى
بيض وصميت
بس الواد بياع الشاى تقريبا
عارف وضع البت
يخرب بيت أمك بت
عماله بتتزخنق فى الواد
والواد نسى نفسه
انهضنى يا عم بكباية شاى
والسكر خليه زايد
قول يا معلم
أيه حكاية البت الواقفه
اللى فى ريح الكرسى التانى
والواد الواطى اللى وراها
بعد شويه يا افندى
البت هتنزل
والواد هيهبهب زى الكلب على فلوسه
وان فكرت انك تتكلم
يعملوا فيك حاجه
بِشْله فى وشك مثلا
أو جايز البت
تاخدك ع الشرطه وتعملك محضر
دى عصابه يا عم
غمض عينك لما الرحله تعدى
شكلك رايح منطقة التجنيد
دا صحيح
طب جهز نفسك
لسه محطه وندخل ع الزقازيق
أيه الموضوع بعد الشاى
يخرب بيت أم دى كباية شاى
الشاى زى اما يكون00
فيه دوا تهييج الأفكار
تركب تانى القطر وترجع
ولا تِحُط ايديك تحت العَجَله
عشان يقطعها القطر
وساعتها ما هتروحش الجيش
يخرب بيت أم الشاى
على بيت أم اللى بيعمل شاى فى القطر
مالك يا دماغ عبتواب
كل دى منطقة التجنيد
والناس دى كمان كلها فى الجيش
امال مين اللى هيزرع فى الأرض
مين اللى يِـدُور فى المصنع
زى تروس الساقيه
والله كتر خير الدنيا
كل هدومهم لون واحد
وجزامهم لون واحد
والكل
على وسطه حزام
والكل بيبقى قلم فى طابور
لما بينده واحد
معرفش دا خوف
ولا دا حُـب
ولا دا طبع
لما بتدخل منطقة التجنيد
بتحس انك لسه يادوب
مولود من بطن الجيش
هو الأب والأم والصاحب والأخ
هو اللى بيصرف ويلَبِّس
ويعَلِّم ويوَكِّل
بتخش ضعيف
خايف من لون الأيام
بتخلص جيشك راجل
تقدر تتحدى الأوهام
بدؤا فى نده الاسماء
ربنا يسْتُر
ويجى اسمك بدرى يا عبتواب
ان شا الله يكون فيه موت
منصور وحسين
أمن البوابه
جرجس مروان
غرفة عمليات
وسعيد وعلى وعطوان
ميز الظباط
مرقص ومحمد ويسين
حرسك ياحدود
ناجى ودرويش طيران
اشاره يا عبتواب
كل سلاح فى طابور
خلص نفسك يا مُجَنَّد
يالله يارجاله
عايزين نخلص من أول يوم
آه يانى من أول يوم
كان يوم طين
علقوا فى رقابتى الزحافه
وسَوِيت الرمل
وبقيت زى برنجان محروق
من كتر الشمس
واهو عدا الأسبوع الأول
والتانى على نهايه
وفاضلك أسبوع
وتروح لجهاز استطلاع
فى الحسنه
وأخيرا
هترن جهاز التليفون
هتبلغ لزمايلك اشارات
هتكون مسؤل فى الجيش
والله وعدت أيام التدريب
ويرن التليفون
أيوه يا افندم
أسد اتنين وياك
مكتب أفراد
فهد التعيين
كله تمام
فى التو يا افندم
بس يا افندم محتاج لبديل
أمن البوابه يا افندم
والميز والكانتين
تحت أوامر معاليك
من أسد اتنين للنجم
جاتنى اشاره يا افندم
من مركز عمليات
منصوصها
سته على اتناشر فى اتنين
والبحر قريب م الشمس
مخروط فى مثلث على دايره
والتوقيع
دمعه بتهرب م العين
ماشى يا افندم
هبعتها لمكتب افراد
هنكون جاهزين بعد الفجر
ان شاء الله
نلبس ملكى يا افندم
كله تمام
وأخيرا جاتنى اجازه عش تيام
هنصلى الفجر
وهَسَلِّم لبديلى الموقع
وهقول يا فكيك
ياه
كل دى صحرا يا ناس
سبحان الله
وأكيد دا جبل الطور
الأرض اللى تجلى عليها الرب
محروسه يا سينا ان شاء الله
كل الانبيا دهَسُوك
والله رمالك غاليه عالينا
يا قناتك يا سويس
محلاك يا جناين بلدى
ربنا يحميكِ يا مصر
كلها كام ساعه واشوفك يا امه
من شباك العربيه
باينه مشاعل بترول
باين عمال بيشتغلوا فى أسفلت
ودا تقريبا مصنع طوب
ودا مصنع أسمنت
وأماكن عمرانه بسكان
أكتر من ألف جنينة مانجه
ويارب تبارك وتزيد
الله يسَلِّم عُمْرَك يا اسطى
معقول الأجره بعشره جنيه
انا كنت رايح فى القطر
من شهرين بجنيه
متشكر يا اسطى
خيرك موجود
يا حبيبتى يا بلدى
شامم ريحة سنوات عمرى
على طريقك
شايف صورتى فى جدرانك
والاسم كمان منحوت على دربك
نفسى اشبع منك
منك يا حبيبتى أنا جيت
اتعلمت احْبى اما جريت
من مية سواقيك يا حبيبتى
شربت اما شبعت وغنيت
أمه
أنا عبتواب
افتحى يا امه الباب
يا حبيب قلبى يا عبتواب
قالبك طاوعك
تنسانى يومين فوق شهر يا واد
يا امه دا جيش
وكفايه انى بقيت دلوقتى شاويش
احكيلى يا عبتواب عن جيشك
زى ما حبيتك يا امه
زى ما حبيت جدران الدار
زى المسلم ما بحب الجنه
وبيخاف م النار
انا يا امه حبيت الجيش
واتعلمت
ان اللى يقول اسم زميله حقيقى
يبقى بيفشى الأسرار
هتشطف يا امه وجهزى لقمه
وناولينى غيار
عبتواب
مين يا امه بينده ع الباب
والله مافى غير ابن بسيطه
هو اللى بعاود ويسأل
هو اللى مصبرنى على غيابك
لما الشوق بيزيد لك
زى أما يكون بيحس بشوقى
ألقاه واقف ع الباب
ياه
والله ولون الأرض اخضر فى وشك
واسمريت
الشمس يا صاحبى
والخدمه وطوابير
بعدين الأرض السمرا عفيه
يا الله يا عبتواب
نطلع نتمشى لغاية الغيط
ما اعرفش يا عبتواب
ليلة امبارح
شفتك فى منامى
شايل مدفع على كتفك وبتجرى
والدم بيسيل من رجلك
واجرى وراك وازعق
بالصوت العالى
استنى يا عبتواب
رجلك سايل منها الدم
وانت بترمح ولا سائل
وبتزعق بالصوت العالى
والله ما اسيب ابن الكلب فى أرضى
مقدرتش احوش نفسى من الجرى وراك
لما وقعت
شفتك وانت بتجرى وبتبص وراك
وسمعت بصيص صوتك
أرضى 00 أمى 00 أخويا وصاحبى
وسلاحى على اكتافى 00
والناس العواجيز اللى فى بلدى
لو خُـنت العهد
مين يحميهم
ياه
زى اما تكون عايش ويانا هناك
ع الجبهه
العيشه يا صاحبى فى سينا
غير عيشة الأرياف
الواحد فى الأرياف
بيخاف
جايز بيخاف على أرضه
أو بيخاف على ولده
أو بيخاف على ماله
اتعلمنا ان الواحد
لو حب يعيش فى أمان
يمشى
وكأنه لا بيسمع ولا حتى بشوف
انما سينا
ما فيهاش خوف
أول مره أعرف ناس
بتحب الموت
أى نعم الناس عايشين فى سكوت
انما حب الناس للأرض
زى العرض
كل اللى يهم الناس
ازاى تحمى حدودها
لا بتطمع فى حقوق الغير
ولا بتفرط فى تراب أجدادها
وهناك حاجه أكيده كمان
ممكن تلقى نداله فى جندى
فى شاويش أو صول
أو تلقى معفن
شايل على كتفه رتبة ظابط
انما لما تشوف الرتب العَلْـيا
أو تسمع حتى كلامهم
تتطمن
لو شفت نقيب
أو حتى مقدم وعقيد
لو شفت عميد
أو لِوا أركان حرب
لو شفت مُـشير
يعنى الفاتله على اكتاف الواحد فيهم
أغلى وأحسن من ألف وزير
الناس دى يا صاحبى
خوفها على حبة رمل بلادها
أكتر من خوفها على روحها وأولادها
هى دى معنى الوطنيه يا صاحبى
معقول
من كام شهر يا عبتواب
اتعلمت الوطنيه
زى أما تكون متخرج م الكليه الحربيه
الوطنيه يا صاحبى
هى الحق 000 هى الدين
الوطنيه لأهل الجيش
هى النور فى العين
هى العدل بتاع ربنا فى الأرض
كلها كام شهر يا عبتواب وتخلص جيش
كان نفسى ابقى رفيقك فى الجيش
انما وحدانى 000 فردانى
لا شقيق ولا أخت
ولا حتى استمتعت بحضن الأب
طالع لامى
ما تقولش يا صاحبى انك وحدانى
ما انا اخوك 00 واصحابك
وانا عمك
وانا ابوك لو حبيت
واجمل حاجه انك طالع لامك
طالع لامك فى الطيبه
فى بياض القلب
فى الخوف على مصلحة الناس
كانت أحلامها كبيره
وهمومها بسيطه
كان نفسها تفرح بولادك
زى الكتاكيت
تحت جناح الفرخه
مليون رحمه عليك يا بسيطه
انت يا صاحبى اللى قفلت الباب
وهويت الترحال
واما الدنيا اتقلبت أحوالها
واما الحراميه اتنصبوا وزراء
والمساجين أصبحوا رؤساء
الفَرْح بقى يِدَوَّر على سكه يهاجر منها
والخوف اللى يخلى الخُـلق يِدِيق
وبيوت تتهدم على ناسها
ورصاص من شباك الحمام
ودانات الدبابه تهد جدار
وشوية خنازير
يحبسوا طيار م الأردن
ويكبوا عليه البنزين ويولعوا فيه
خنازير تانيه فى ليبيا بيدبحوا ناس
على شط البحر
وكلاب تغتصب الست فى بغداد
والراجل ايده متكتفه ورا ضهره
كل دا تحت شعار الاسلام
دا كلام
والله لا يهود ولا كفره
ولا حتى اللى مالوش دين
يعمل زى اولاد الكلب
مفروض يقولولهم
الاخوان الشياطين
وساعتها انت زعلت
لما جادلت معاك
كان فى دماغك
ان الاسلام
نشروه بالكرباج والسيف
الاسلام مش لوى دراع
الاسلام بالكيف
بس اما خيوط الغربه لفت على قلبك
ضحيت بفلوسك ومحلك
حتى العربيه اللى انت راكبها
ما بقتش بتاعتك
سبت المال والحال والمحتال ورجعت
مشتاق لتراب الأرض فى مصر
من غير ما تقول
كل اللى فى بالك
امك ومراتك واولادك
وان كان فى القلب مكان خالى
يبقى لعبتواب
أمك ماتت
والأيام نشرت على عبتواب
أحزان الوحده
اللى انت يا صاحبى ما عرفتوش
أو ما فهمتوش
مش فرحة عبتواب برجوعك
لأ
فرحة مصر بعودة أولادها
عارف
ان رجوعك كان صعب
وطريقك كان فيه ميت حاجز
بس المفروض تتأكد
ان الانسان خطاء
مثلا
قفص الفاكهه
صعب يكون ع الفرازه
حبايه ضاربه 000 حبايه فاسده
حبايه لونها غير لون التانيين
أى نعم احنا اتغيرنا أكيد للأحسن
انما فيه ناس فاسدين
طب قوللى
لو كل البشريه
ناس صالحين
يبقى النار ربنا دبرها لمين
عبتواب
افتح يا ابنى الباب
ارحم شيبتى يا عبتواب
معقول يا وليدى حد ينام
عشرين ساعه من غير حمام
من غير أكل وشرب
النبى لو ما فتحت يا عبتواب الباب
لا اضرب بالصوت والناس تتلم
هو انى ناقصه يا حبة عينى
شيل الهم
النبى خايفه يا واد
لا تكون مُـتْ
أهو جالك صاحبك
ان شا الله يكسر أم الباب
مالك بس يا عبتواب
حابس روحك واللون مخطوف
زى الطير المكسور له جناح
والله يا صاحبى صحيح
بس أنا ما حبستش روحى
أنا كنت فى مشوار
معرفش ان كان حلم
ولا كابوس
صاحبى يا عبتواب
لما تنام
اوعاك تقفل على نفسك باب
أنا كنت فى حلم طوييييييييييل
زى اما يكون مرسوم فى كتاب
احكيلى يا عبتواب
الحلم اننى رحت الجيش
والرتبه على دراعى شاويش
حامى حدود الوطن الغالى
وان غفلت عينى
لا هكون ولا اعيش
شاعر القريه
فيصل بدر
ليست هناك تعليقات:
إرسال تعليق