البت_بتاعته/ بقلم /هشام ابراهيم

#البت_بتاعته
البت بتاعته
تشبهه بالظبط
النسخه المجنونه
ف حلمه
وعياره الفالت
والموزون
توأمه ف الشكل
وف المضمون
متفصله علي
قد براحه
كانها نسخه
بالكربون
البت الناعمه
البسكوته
كوباية الشاي
المظبوطه
اسطورة التاء
المربوطه
ملكة جمال
قلبه وعينه
اللوثه الهوسه
العفريته
حجاب الشوق
والتحويطه
حظ الموعود
والتوريطه
والفجر الطارح
ف جبينه
ديما لازقاله
زي القط
تتمحك فيه
وتدور وتلف
متشعلقه ف رقبته
حاضناه امامي
وخلف
تبوس حواف
سلسلته
يرد لها
البوسه الف
تقوله بتحبني..؟
يفضل يدور
ويلف
تقوله
بتحبنيييييي..؟
وتضغط ف
اخر حرف
تقوله جننننننننتي...!!
يضحك..فتصرخ
اوووفّ..!!!
فجأه تشوف
ف عينه
من غير ما ينطق حرف
كل عشاق العالم
ف النظره ....
وقفت صف...!!!
تفضل تضحك
زي الهبله
والكون مش سايع
احساسها
تطلع له سجاره
من العلبه
وتبوسها قبل
ما يلمسها
وتروح جري
وتلزق جنبه
وتشاركه سحابة دخانه
وتفصص له
اللب ف بقه
وتدندن
شخابيط الحانه
وان بطل
يغازلها تزقه
وتشده من
طرف لسانه
عيله لمضه
بعيون حلم
مبتشبعشي مغازله
سانده علي
روحه سلم عشق
واخداه...
طالعه ونازله
شابكة ف ضفايرها
جناين نور
وعطور...
من عالم تاني
الضحكه ان طلعت
منها ولو
حتى من نص شفايف
بتعمل بينه
وبين احزانه
اكبر جدران عازله ...!!!
:
لما تشوفه
بيكتب حاجه
تقوله انا بكتب
احسن منك
يضحك ويقول
طب قولي حاجه
تعمل جد
بقي وتتنك
تقعد ساعه
تشخبط جنبه
وتيجي تقوله
اسمع دي
( انا ياحبيبي
بحبك موت
حبك الفرخه
للكتكوت
حب البطه
للبطبوط
حب البردان
للزعبوط
انت حبيبي
وبابا وماما
وكل منايا
تكون مبسوط)

ضحكته توصل
اخر الشارع
وهي بتخبطه
بوكس ف كتفه
احسن منك
عندك مانع ...؟
يحضنها ..
ويضحك
من قلبه
اسمعي دي..:
( انا زارعك
ف ارضي
جدر ضي
طرح شجر
علو السما افراح
عمري ما حسيت
غير معاكي
باني حي
واني طير
طاير بالف جناح
احفريني
فوق جبينك
وشم عشق
وانطقيني
من شفايفك
حرف صدق
كوني مهد للحنين
كوني بدء
ومتنتهيش
مفيش ما بينا فراق..)
شاف ف عنيها
بسمة عشق
واصله لاخر
قلب الروح
حطت راسها
ف حجره ونامت
سابت باب
الدفا مفتوح
حرك صوابعه
ف ليلها السايب
تمتم دعوة
عشق لربه
غمض عينه
وهو حاضنها
وكانت هي
بتحضن قلبه...!!! #هشام ابراهيم
5/1/2017