الاثنين، 7 نوفمبر 2016

احلفلك ميت يمين/ بقلم / محمد سالم

احلفلك ميت يمين
عايشين فيكي مظلومين
وعجلك ليه ماشي
شمال مش يمين
............
شوفي شعبك اللي ضايع
ونظامك عايش في قصر
اطفالك ملت الشوارع
والله حرام يا مصر
.............
جوع وزل مفيش حريه
ويشبع فيكي اللي يخون
فلوسك كلها مع 100
ونسيتي انك 100 مليون
.............
ليه ليهم ام حريصه
وليه سايبه باقي الشعب
ولا هما ولاد عزيزه
واحنا فيكي ولاد الكلب
..............
صبرنا اكتر من صبر ايوب
حسي بالشعب المدبوح
شعبك علي أمره مغلوب
لقمتنا بطلوع الروح
............
احنا اللي حاميين الحمي
واحنا اللي صاينينك
ليه تزلي فينا انما
تعلي اللي خاينينك
ليه يحجبوكي عننا
ويغمضو في عينك
..........
غنينا تسلم الايادي
شحتونا ومدينا الايداي
وعشان طالبنا بحريه
قالو عيلنا انتو الاعاديي
............
قالو اتكلم صوتك سمعينو
بيك بلاك طريقنا مشيينو
وانتخب اللي انت عايزو
لكن يمسك اللي احنا عايزينو
...........
ادينا كتير امتي هتدينا
ليه نحبك وتيجي علينا
ميه نيلك ليهم صافيه
ميه مجاري توصل لينا
...........
شهدا الميدان راح حقهم
تتتكلم هتروح عندهم
كام ميت في العياط يا قطر الصعيد
كام ميت غرقان يا مركب رشيد
يارب انت القوي قادر تهدهم
............
شعب شاف الظلم عمل كفيف
شعب مش لاقي حق الرغيف
جبروه ع السكوت لانه هيموت
لو فكر يوم يعيش شريف
قلم . محمد سالم
مرسلة بواسطة في
التسميات:

ليست هناك تعليقات:

إرسال تعليق

الاشتراك في: تعليقات الرسالة (Atom)